Um mig

Ég heiti Elísabet Heiður Jóhannesdóttir og er tveggja barna móðir, náttúruunnandi og mikill lífsstílspælari. Ég er með löggildingu til þess að starfa sem næringarfræðingur og einnig með ráðgjafaréttindi í næringarinnsæi (e. Intuitive Eating). Ég bý með fjölskyldu minni í Svíþjóð og starfa við næringarráðgjöf og fræðslu með heildrænum og sannreyndum aðferðum.​

​​

Ég starfa eftir þyngdarhlutlausri nálgun sem þýðir að ég veiti gæða þjónustu við hæfi, burt séð frá líkamsgerð viðskiptavina minna. Ég mismuna ekki fólki eftir þyngd og reyni ekki að breyta líkamsgerð þeirra, heldur að bæta heilsu þeirra. Ég mæli árangur út frá vellíðan, hreysti, bættu mataræði, bættum blóðgildum o.s.frv. Ég set fólk ekki á tískukúr eða í megrun, heldur hjálpa því að finna sína leið að heilbrigði með vellíðan að leiðarljósi. Ég trúi að heilsa sé persónuleg vegferð og lífsstíllinn í heild skiptir meira máli en einhver skyndilausn.